Cursei a licenciatura en Química na Universidade de Santiago de Compostela, título co cal obtiven no ano 2009 o premio extraordinario de licenciatura da comunidade autónoma de Galicia. Nese mesmo ano, comecei a estudar un mestrado de Biotecnoloxía, ata setembro de 2011 (120 ECTS), incorporándome ó grupo de Xenética psiquiátrica do Instituto de Investigación Sanitaria de Santiago de Compostela (IDIS) e a Fundación Pública Galega de Medicina Xenómica para a realización do proxecto fin de mestrado en “Susceptibilidade xenética compartida entre os distintos trastornos psiquiátricos e suicidio”.
En novembro de 2011 obtiven unha beca da Xunta de Galicia para estudos de doutoramento, coa cal comezo a realizar a miña tese doutoral en xenética psiquiátrica no proxecto co título de "Identificación de variantes de risco en rexións promotoras de xenes asociados a esquizofrenia mediante tecnoloxías de secuenciación de nova xeración de alto rendemento”. O proxecto ten por finalidade a identificación de variantes pouco comúns que confiran risco moderado a padecer esquizofrenia en rexións promotoras de xenes de susceptibilidade a esquizofrenia en estudos GWAs, xenes afectados por variantes estruturais de alto risco como microduplicacións e microdelecións e xenes funcionalmente relacionados cos anteriores.
Como parte da formación predoutoral, obtiven unha beca da fundación barrié para a realización dunha estancia no Columbia University Medical Center da Columbia University (New York), de Marzo a Outubro de 2014. Alí, realicei un proxecto para o estudo e análise bioinformática de datos de RNAseq de córtex prefrontal e cingulado en esquizofrenia.
Actualmente, traballo na Fundación Ramón Dominguez , a cargo dun proxecto de estudo farmacoxenético da resposta ó tratamento en TDAH e TOC, á par que remato o meu proxecto de doutoramento para obter o título de doutor.